Ministri i Punëve të Brendshme z. Xhelal Sveçla, priti  në takim Ministrin e Punëve të Brendshme të Maqedonisë së Veriut, z. Pançe Toshkovski, me të cilin biseduan për bashkëpunimin ndërmjet dy vendeve, me theks të veçantë sa i përket zbatimit të marrëveshjes së fundit për pikë-kalimin e përbashkët kufitar Hani i Elezit - Bllacë, i bazuar në parimin "Hyrje-Hyrje", si dhe për pikën Glloboqicë - Jazhincë ku shumë shpejt, me finalizimin e punimeve teknike do të fillojë zbatimi i të njëjtit parim.  

Gjatë takimit, të dy ministrat diskutuan për thellimin e bashkëpunimit bilateral ndërmjet dy ministrive, me fokus të veçantë në fushat e sigurisë kufitare, luftimit të krimit të organizuar, migracionit të paligjshëm, si dhe forcimin e bashkëpunimit policor.

Ministri Sveçla  theksoi rëndësinë e bashkëpunimit rajonal dhe theksoi se marrëveshja e fundit ndërmjet dy vendeve tregon gatishmërinë për avancimin e bashkëpunimit në adresimin e sfidave të përbashkëta të sigurisë dhe me këtë rast, ministri Sveçla shprehi gatishmërinë e Republikës Kosovës për të avancuar më tej marrëdhëniet me Maqedoninë e Veriut, në luftimin e të gjitha llojeve të krimeve.

Nga ana e tij, Ministri Toshkovski vlerësoi bashkëpunimin ekzistues ndërmjet dy vendeve dhe theksoi rëndësinë e shkëmbimit të përvojave dhe informatave për të garantuar siguri të qëndrueshme për qytetarët e të dyja vendeve.

Në fund të takimit, të dy ministrat u dakorduan për të intensifikuar kontaktet ndërinstitucionale dhe për të punuar së bashku në projekte të përbashkëta në kuadër të iniciativave rajonale dhe evropiane për siguri dhe rend.