Ministri i Punëve të Brendshme, z. Xhelal Sveçla me rastin e mbajtjes së mbledhjes së parë të përbashkët të dy kuvendeve atë të Republikës së Kosovës dhe atë të Republikës së Shqipërisë mbajti një fjalim.

Më poshtë keni fjalimin e plotë të ministrit, z. Xhelal Sveçla:

“E nderuar Kryetare e Kuvendit të Shqipërisë znj. Nikolla,
I nderuar Kryetar i Kuvendit të Kosovës z. Konjufca,
Të nderuar Kryeministra z. Rama dhe z. Kurti,
Të nderuar Deputetë,
Të nderuar kolegë Ministra,
 
Të dashur bashkëkombas,
 
Është padyshim nder dhe privilegj i jashtëzakonshëm të jem këtu mes jush e kështu të gjithë së bashku në shënimin e ditës më të rëndësishme për kombin tonë 28 nëntorin.
 
Të dashur motra e vëllezër, 
Të nderuar zonja e zotërinj,
 
Përvoja jonë si shqiptarë nuk ka qenë e qetë. Ne nuk përjetuam periudha të gjata e të qeta të ndërtimit të shtetit tonë. Na është dashur të punojmë nën regjime që jo patjetër kanë qenë në përputhje me qëllimësitë dhe interesat jetike të kombit. 
 
Projektin e plotë të shprehur me aktin e shpalljes mbarëkombëtare të shtetit tonë të parë, nuk na lanë kohë ta jetësojmë në tërësinë e tij. 
 
Ndërprerjet nga copëtimi, nga lufta e parë, nga lufta e dytë, nga muri mes kampeve, ne i pësuam me shumë se kushdo. 
 
Por përpjekjet dhe sakrificat nuk u ndalën deri sa e çliruam edhe Kosovën. 
 
Siç na mëson dhe poeti i madh i ndërgjegjes, Migjeni, në forma dhe në akte rezistence nga më të ndryshmet, ne ditëm me thanë nuk i duam humbjet prore. 
 
Ne vepruam si një popull edhe pse në troje të ndara. Ne i shuam befasisht për armiqtë tanë ekzistenciale barrierat që na i vendosën.
 
Dhe sot, nga ai projekt i shpallur në 28 Nëntor 1912, ne kemi realizuar një shtegtim të madh të shqiptarëve. 
 
Me fuqinë shtetërore që zotërojmë do të hedhim hapat përafrues në bashkimin e inteligjencave dhe vullnetit kombëtar. Ashtu siç po i shtojmë e thellojmë marrëveshjet e bashkëveprimin mes nesh. 
 
Tani është koha më shumë se kurrë që hapat tonë të jenë një. Që mbërritja jonë drejt qëllimit të jetë sa më e shpejtë.
 
Marrëveshjet mes shteteve tona kanë filluar të prodhojnë efektet e tyre. Emocioni i këtyre efekteve do të jetë sigurisht i madh kur të jetësohen plotësisht e të shtrihen në kohë. 

Le të shprehemi pra publikisht, mbi kahjen e marrëveshjeve të tashme dhe atyre që do të bëjmë në të ardhmen.
 
Bashkëpunimi në fushën e rendit dhe sigurisë ka fokus përafrimin e standardeve në fushën e sigurisë publike, patrullimit dhe kontrollit të përbashkët te kufirit shtetëror, masave të përbashkëta për sigurinë rrugore, rregullimin e regjimit të trafikut lokal, pajisjen me leje qëndrimi të përkohshëm, leje kalimi, ndihma reciproke në raste të emergjencave civile, etj.

Ka një sërë marrëveshjesh me objekt hapjen e pikave të përbashkëta të kalimit kufitar, që synojnë thjeshtësimin e procedurave të kontrollit kufitar në interes të lehtësimit në qarkullimin e njerëzve dhe mjeteve bazuar në parimin një ndalese një kontroll.
 
Në zbatim të këtyre marrëveshjeve gjatë sezonit veror, qershor - shtator, qytetarët në dy anët e kufirit kanë lëvizur pa i'u nënshtruar asnjë kontrolli në pikat e përbashkëta të kalimit kufitar. Në funksion të lëvizjes së lirë të
qytetarëve, kalimi pa ndalesa, vijon të aplikohet edhe gjatë fundjavave dhe ditët e
festave zyrtare/ shtetërore.

Si rezultat i tyre, mundësohet lëvizja e lirë e qytetarëve në zonat ndërkufitare Shqipëri-Kosovë duke u eliminuar çdo barrë burokratike e financiare. Përmes dokumentit, leje e trafikut lokal, zbatohet regjimi i trafikut lokal kufitar për banorët e zonave deri në 30 km nga kufiri tokësor. Qytetarët e zonave kufitare kanë mundësi të kalojnë kufirin e të qëndrojnë në zonën kufitare për arsye
sociale, kulturore, familjare etj.
 
Këto marrëveshje dhe ato që do të arrijmë në të ardhmen, do të prodhojnë unifikimin e hapave tanë. 
 
Dikur detyrë e rilindasve, veprimtarëve, aktivistëve e militantëve patriotë, sot detyrë e shteteve tona. Shteteve patriote. 
 
Jemi duke vijuar punën në forcimin e shtetit të Kosovës. Por të gjithë jemi të qartë mbi rëndësinë e Republikës së Shqipërisë në të gjithë proceset e forcimit të Republikës së Kosovës. Mes nesh dhe jashtë nesh. Bashkë me Shqipërinë jemi të pakapërcyeshëm gjeopolitikisht, ekonomikisht dhe shoqërisht. 
 
Ne e mbështesim këtë besim në faktin se ne jemi dy pjesë të të njëjtit projekt rilindas që u zhvillua progresivisht në Prizren e në Vlorë. 
 
Tani ne kemi detyrën që na takon prej kohës sonë, sipas hapave që prodhohen në arenën gjeopolitike botërore. 
 
Agresioni rus mbi Ukrainën dhe rezistenca e shkëlqyer e Ukrainës i kanë qartësuar palët në Ballkan edhe midis më hezituesve në Evropë. 
 
Ne shqiptarët, jemi populli që nuk pushtuam dhe nuk sulmuam kurrë askënd tinëzisht e padrejtësisht. Jemi po ashtu populli që u solidarizuam çdo herë me çlirimtarët dhe u vendosëm në çdo etapë historike në krahun e së drejtës. Që kurrë nuk e nënshtruam të dobëtin as nuk përfituam prej atyre që janë pak. 
 
Në të njëjtin vektor veprojmë dhe sot dhe në të njëjtin horizont i kemi edhe projektet tona ndërshtetërore. 
 
Shpresoj se ne e ndjejmë në këtë formë bashkërisht aktualitetin kompleks. Pikërisht në këtë ditë të madhe, në ditën e themelimit të shtetit të shqiptarëve. 
 
Tani, më lejoni që si Ministër i Punëve të Brendshme, këtë 28 nëntor mbi të gjitha t’ua uroj zyrtarëve policorë të cilët më mirë dhe më shumë se kurrë po i shërbejnë Republikës.
 
 
Gëzuar motra e vëllezër!”